شەریعەتی لاقەکردنی مناڵانمان لە پەرلەمانی عێراق ڕیسواکەن و ڕێگە لەم بەربەریەتە ئیسلامیە بگرن

میلیشیا شیعەکان و حزبە ئیسلامیە سونەکان بڕیاریان داوە کە یاسای باری کەسی عێراقی بەپێی شەریعەتی ئیسلام و قانونی جەعفەری بگۆڕن تاکو بەشودانی کچان لە ٩ ساڵەوە یاسایی بێت. لە هۆکارەکاندا دەڵێن؛*١ کە ئەمە بەپێی دەستور ڕێگە دراوە کە هیچ یاسایەک نابێ دژی سەوابتی ئیسلام بێت و هەر مەزهەبەش دەبێ بە پێی حوکمە شەرعیەکانی خۆی ماف وباری کەسی هاوڵاتیان دیاری بکا.
ئەمە بەڕاستی مایەی شەرمەزاریە نەک تەنیا بۆ ئەو میلیشیا تیرۆریستانەی ئەمڕۆ بونەتە دەسەڵاتداری عێراق بەڵکو بۆ هەموو لایەن و هێزێکی ناوەوە و دەرەوەی عێراق کە لەم پەرلەمانە ڕیسوایەدا دانیشتوە و یان مامەڵە لەگەڵ ئەم دەسەڵاتە کۆنەپەرستە ئیسلامیەی عێراقدا دەکا. ئەمە بڕیاری لاقەکردنی ملێونەها مناڵە لە عێراقدا بەبەرچاوی دەزگا نێودەوڵەتیە دووڕوەکانەوە تێپەڕدەبێ بەبێدەنگی. ئەمە مایەی شەرمەزاریە بۆ هەرکەسێک کە پشتیوانی لە دەستوری کۆنەپەرستانەی عێراق و سەوابتی ئیسلام و یاسای جەعفەری و ئەم یاسای دەورانی بەربەریەت دەکا.
ئەم میلیشیا شیعەو هێزە کۆنەپەرستە سونانەی عێراق دەیانەوێ لەڕێگای لاقەکردنی مناڵانەوە ئەم کۆمەڵگەیە بکەنە زەلکاوێک لە کۆنەپەرستی کە زۆر ئاسان بتوانن ژیان و کەرامەتی خەڵکی کرێکار و زەحمەتکێشی عێراقی پێشێل بکەن و لەم ڕێگەیەوە دەسەڵاتی سەرکوت و بێ مافی بەسەر خەڵکی ئازادیخوازی عێراقدا بسەپێنن.
ناوەندی سێکولار لەکوردستان بانگەوازی خەڵکی عێراق دەکا کە دژی ئەم بێ حورمەتیەی پەرلەمانی میلیشیا شیعەکان و هێزە کۆنەپەرستە سونەکان و دەستور و یاسای باری کەسێتیەکەیان بوەستنەوە و مناڵان لەدەست ئەم یاسا دژبە ڕەوشتی مرۆڤایەتی ڕزگاربکەن و ڕێگا نەدەن لاقەکردنی مناڵان لە عێراقدا وەک ئێران و سعودیە و دەوڵەتە ئیسلامیەکان ڕەسمیەتی پێ بدرێ و کۆمەڵگەی عێراق لەم بەربەریەتە ئیسلامیە ڕزگاربکەن.
ئێمە لە کوردستان کاتێک دژی بەندی ٦ ڕەشنوسی دەستوری هەرێمی کوردستان بوین کە دەڵێ دەبێ شەریعەتی ئیسلام وەک بنەمای یاساکان دابنرێ هەر لەهەمان ڕوانگە و هەر لەبەر هەمان هۆ بوە کە کوردستان نەکرێتەوە ئەم عێراقەی ئێستا بەهۆی ئەو مادەیەوە یاسای باری کەسی دەگۆڕن بە یاسای لاقەکردنی مناڵانی ٩ ساڵ و هەرچی ماف و ئازادیەکاندا بە حوکمی شەریعەت و سەوابتی ئیسلامی لەم چەشنە قەدەغەدەکەن و هەرچی ڕوخساری کۆمەڵگەی مۆدێرن و پێشکەوتوە دەیسڕنەوە.
ئێمە پشتیوانی هەموو هەوڵێکی سێکولار وئازادیخوازی خەڵکی عێراق دەکەین کە دژی ئەم یاسای لاقەکردنی مناڵانی عێراق تێدەکۆشێ و خۆمان بە هاوخەباتیان دەزانین و بەداخەوەین کە ئەم دەنگە سێکولار و ئازادیخواز و منداڵپارێزەی خەڵکی عێراق لاوازە و پێویستە هەر ئینسانێێک هەست و خواستی ئینسانی لەدڵدایە ئەمە بەئەرکی خۆی بزانێ کە بۆ پارێزگاری لە مناڵانی عێراق بێنە مەیدان.

ناوەندی سێکولار لەکوردستان

*١الأسباب الموجبة
انسجاماً مع ما أقرته المادة (2) من الدستور أنه لا يجوز سن قانون يتعارض مع ثوابت أحكام الإسلام، وما أقرته المادة (41) من ضمان حرية الأفراد في الالتزام بأحوالهم الشخصية حسب دياناتهم أو مذاهبهم أو معتقداتهم أو اختياراتهم، وللحفاظ على المحاكم كجهة قضائية موحدة لتطبيق الأحكام الشرعية للأحوال الشخصية بعد الرجوع إلى الجهة ذات الاختصاص، شرع هذا القانون.

Leave A Reply

Your email address will not be published.